Ўзбекистон Республикасининг амалдаги қонунчилик ҳужжатларига асосан тадбиркорлик субъектлари бизнесининг ҳуқуқий ҳимояси судгача
ва суд тартибида таъминланади.

Хусусан, қуйидаги давлат органларига бизнесни ҳимоя қилиш бўйича вазифа ва функциялар юклатилган.

- Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил  (бизнес омбудсман) – тадбиркорлик субъектлари фаолияти текширувлари ўтказилишининг қонунийлиги устидан назоратни амалга ошириш, белгиланган тартибини бузган ҳолда ўтказилган текширувлар, шунингдек тадбиркорлар мурожаатларини кўриб чиқиш тартибини бузганлик бўйича мансабдор шахсларни жавобгарликка тортади;

- Ўзбекистон Республикаси Рақобатни ривожлантириш ва истеъмолчилар ҳуқуқларини ҳимоя қилиш қўмитаси – инсофсиз рақобат, картил келишувлари, товар, иш ва хизматларнинг эркин ҳаракат қилишини чеклаш, давлат органлари ва ташкилотлари томонидан рақобатни чекловчи қарорлар  қабул қилиш ва ҳаракатлар содир этганлик бўйича ишларни кўриб чиқади ва ушбу қонунбузилиш ҳолатларини бартараф этиш бўйича кўрсатмалар беради, белгиланган тартибда фуқаролар ва мансабдор шахсларга нисбатан маъмурий баённомалар расмийлаштириб, тегишли судга чора кўриш учун киритади;

- Ўзбекистон Республикаси Адлия вазирлиги (тегишли кенгашлар орқали) – ихтиролар, фойдали моделлар ва саноат намуналарини,
селекция ютуқларини, интеграл микросхемалар топологияларини, товар белгилари, хизмат кўрсатиш белгилари, географик кўрсаткичлар ва товар келиб чиққан жой номларини ҳуқуқий муҳофаза қилиш билан боғлиқ апелляцияларни, шунингдек давлат хизматларини кўрсатиш билан боғлиқ маъмурий ҳужжатлар бўйича низоларни судгача кўриб чиқади ва унинг натижаларига кўра тегишли қарор қабул қилиди;

- Ўзбекистон Республикаси Бош прокуратураси ва унинг қуйи
тизими –  тадбиркорлик фаолиятига тўсқинлик қилиш, қонунга хилоф
равишда аралашиш билан боғлиқ жиноятлар ҳамда хўжалик юритувчи субъектларнинг ҳуқуқлари ва қонуний манфаатларига тажовуз қиладиган бошқа жиноятлар бўйича дастлабки тергов ҳаракатларини олиб боради;

- Ўзбекистон Республикаси Олий суди ва унинг қуйи суд инстанциялари – тадбиркорлик фаолияти билан боғлиқ давлат органларининг, фуқаролар ўзини ўзи бошқариш органларининг, бошқа ташкилотларнинг қонунга хилоф қарорлари, улар мансабдор шахсларининг қонунга хилоф ҳаракатлари (ҳаракатсизлиги) кўриб чиқиш ва уларни ҳақиқий эмас деб топади.

Амалдаги қонунчилик ҳужжатларига асосан давлат органлари томонидан тадбиркорлик фаолиятида текширув ўтказишда тадбиркорлик субъектлари қуйидаги ҳуқуқларга эга:

назорат қилувчи органлар мансабдор шахсининг текширув масалаларига алоқаси бўлмаган талабларини бажармаслик;
текширув ўтказишда шахсан ёки ўз вакили (адвокат) орқали иштирок этиш;
талаб қилиб олинаётган ҳужжатларни, агар ушбу ҳужжатлар ёки уларнинг нусхалари тадбиркорлик субъекти томонидан назорат қилувчи органга олдинги ўтказилган текширувларда тақдим этилган бўлса, тақдим этмаслик;
назорат қилувчи орган мансабдор шахсининг рухсати билан экспертиза ўтказишда иштирок этиш ва экспертга тушунтиришлар бериш, экспертнинг хулосаси билан танишиш;
экспертни рад этиш ва экспертни ўзи кўрсатган шахслар орасидан тайинлаш тўғрисида илтимос қилиш;
текширув материаллари билан танишиш ва текширув далолатномасини олиш;
назорат қилувчи орган мансабдор шахсининг ноқонуний хатти-ҳаракатлари юзасидан, шунингдек, белгиланган тартибда текширув натижалари устидан шикоят қилиш;
текширувни ўтказиш тўғрисидаги буйруқ (қарор, фармойиш) белгиланган тартибда расмийлаштирилмаган ва буйруқ нусхаси тадбиркорлик субъектига берилмаган, текширув тўғрисида ваколатли орган белгиланган тартибда хабардор этилмаган (текширув бошлангандан сўнг
24 соат ичида хабардор этиш тартиби бундан мустасно), назорат қилувчи орган мансабдор шахсида тадбиркорлик субъектлари фаолиятини текшириш ҳуқуқини берувчи махсус гувоҳнома мавжуд бўлмаган, Текширувларни рўйхатга олиш китобига маълумотларни киритишдан бош тортилган ҳолларда, назорат қилувчи орган мансабдор шахсини текширув ўтказиш учун ўз ҳудуди ва биноларига қўймаслик.
Тадбиркорлик субъектлари қонунчиликда белгиланган бошқа ҳуқуқларга ҳам эга

Амалдаги қонунчилик ҳужжатига асосан агар қонун ёки шартномада зарарни камроқ миқдорда тўлаш назарда тутилмаган бўлса, ҳуқуқи бузилган шахс ўзига етказилган зарарнинг тўла қопланишини талаб қилиши мумкин.

Мълумот учун, зарар деганда, ҳуқуқи бузилган шахснинг бузилган ҳуқуқини тиклаш учун қилган ёки қилиши лозим бўлган харажатлари, унинг мол-мулки йўқолиши ёки шикастланиши (ҳақиқий зарар), шунингдек бу шахс ўз ҳуқуқлари бузилмаганида одатдаги фуқаролик муомаласи шароитида олиши мумкин бўлган, лекин ололмай қолган даромадлари (бой берилган фойда) тушунилади.

Шунингдек, қарздор мажбуриятни бажармаганлиги ёки лозим даражада бажармаганлиги туфайли кредиторга етказилган зарарни
тўлаши шарт.

Зарарни ундириш билан боғлиқ даъволар фуқаролик ишлари бўйича судга (агар зарар етказувчи шахс фуқаро бўлса) ёки иқтисодий ишлар бўйича судга (агар зарар етказувчи шахс юридик шахс, шу жумладан тадбиркорлик субъекти бўлса) тааллуқли ҳисобланади.